حول أزمة “الاشتراكي الموحد” مناضل يساري يكتب: بلاغ انتخابي

سعيد زريوح

_ عزيزي المواطن، حبيبتي المواطنة،
حنا الحزب لي الرمز ديالو ساهل وباين (غي تفكر باش كتضيباني ملي كيقطعو عليك الضو وغادي تعرفو، القضية ساهلة). البرنامج دالحزب حتى هو ساهل، تقدر تكتفي غي بالصورة لي فيها القائدة مصورة مع الرمز وغادي تفهم، نحن يسار كيلبس زوين وكيعرف يتصور ويختار الألوان الواعرة وكيرفع شارة النصر فاش كيتقلق، سي طري سامبل شيغ سيطوايان….

عزيزتي المواطنة، حبيبي المواطن،
حنا ولاد الناس وباب دارنا مفتوحة، يلا بغيتي ترشح معانا مرحبا وألف مرحبا. ٱجي عندنا وجيب معاك ملف الترشيح لي خاص يكون فيه صورة شمسية وسيفي CV مكتوب فيه نقطة وحيدة: أنت ماشي شفار. غير هو كاخصك تعرف حنا رآه حزب “حازق” وداكشي علاش مزياااان تكون عندك اللعاقة باش تقد برأسك وتضبر علينا يلا كان بالإمكان. شفتي حبيبي المواطن نحن حزب كوووول شروطنا ومساطرنا بسيطة جدا جدا.

مواطنونا الغزلان،
كنعولو عليك بزززاف باش نعوضو هادوك لي هربوا من الحزب فٱخر لحظة ونديرو شي اكتساح انتخابي على حسابك ونوصلو للعتبة باش نستافدو من دعم الدولة…أما داكشي دالحكومة ، فلكل حادث حديث. من بعد الانتخابات انتا وخاطرك، بغيتي تبقا معانا ماشي موووشكيل. بغيتي تمشي لشي حزب ٱخر حتى هي ماشي موووشكيل، غادي نطردوك كيف العادة ومريضنا ما عندو بأس.

هذا بلاغ انتخابي لحزب يساري يتبنى اشتراكية القرن 3000 هجرية.